promo
André Fouad PDF  | Print |  E-mail

KADANS FANM KREYOL

Ak André Fouad*


Mwen pentire tout mo k'ekziste
ak 7 koulè lakansyèl yo
pou'm salye k-dans fanm kreyòl yo
Fanm larèn solèy Bondye beni
Fanm 4 sezon yo
Fanm gran rivyè bay lanmen

Mwen satiyèt tout sa mwen jwenn
sou wout lekzistans
pou'm salye yon bann fanm zile kreyòl
k'ap kontinye bay limyè tandrès
lavi lanmou
lespwa ak anpil kouray

Fanm kreyòl s'on bèl mizik pou douvanjou ka leve
Fanm kreyòl s'on bèl solèy k'ap kabicha
sou tèt mòn peyi Dayiti
Fanm Kreyòl s'on grap zetwal nan syèl peyi Lamatinik
Fanm kreyòl s'on flè prentan mwen keyi
nan jaden zile Seychelles yo

Nou fè lavi klere jouk nan fonkè plimeyank yo
lavi bèl jouk nan kè mizisyen yo
nou fè papiyon lasenjean
vole san kè sote
nou fè,nou fè latè pyafe
nou fè rèv pouse nan tout jaden

M' ap gaye nouvèl la
pou zwazo yo ka tande vwa w
m' ap mache sou tout chimen
pou drapo lavi w pa janm desann
K-dans fanm kreyòl yo s’on jwisans
Mwen renmen ou
 pi fò, pi pre ou, pi lwen ou.

*****************************************


Fè Nwa

Ou tenyen souvni m
nan labrenndiswa lanmou
mwen bite yon lòt kote
depi jou sila
kote metrès lanmè
rantre nan kokiy li.


 (Etensèl mo m yo, 2006)


Mezanmi


Toulejou bouch mwen plen dlo
tout dlo lari
tout dlo lanmè
tout dlo larivyè
tout dlo Bwadchenn
tout dlo Lasèn
tout dlo flèv Latibonit
tout dlo Misisipi
tout dlo lavi bare
tout dlo lawouze pote banm
lè solèy ap konte pa
pawòl youn pa youn
nwaj youn pa youn
douvanjou m kouvri
ak nwaj aladriv


(Souf Douvanjou, 2011)


*Andre Fouad se yon aktè, dizè, powèt, ekriven, jounalis, kolaboratè jounal Connecticut Haitian Voice. Se yon ansyen prezantatè nan Télévision Nationale d’Haïti. Li pibliye plizyè liv tankou Bri Lan Nwit, Etensèl Mom M Yo e Souf Douvanjou,ak yon koleksyon pwezi sou CD ki rele Chimen Souvni-m.

Powèm li yo parèt nan anpil jounal, revi ak antoloji. Li resevwa anpil pri an Ayiti ak deyò peyi a pou èv li yo.